Мы выдзелілі 24 індыкатары, якія ўплываюць на беларускую будучыню, і, як вынікае з апытання 58 экспертаў, большасць з гэтых паказнікаў характарызуе Беларусь як краіну ў стане стагнацыі. Гэта адрознівае, дарэчы, новы Індэкс ад леташняга, калі будучыня ўяўлялася больш рознакаляровай, то ў гэтым годзе колькасць шэрага выразна павялічылася.
Размеркаванне паказнікаў ():
Адмыслоўцы, якія прадстаўляюць 37 арганізацый (аналітычныя цэнтры, акадэмічныя структуры і арганізацыі грамадзянскай супольнасці – поўны спіс арганізацый даступны ў датасэце) ацэньвалі паводле шкалы ад 0 % да 100 % імавернасць розных сцэнароў развіцця Беларусі, сукупнасць якіх і з’яўляецца колькасным паказнікам Індэкса беларускай будучыні. Напрыклад, вынік 1,1 азначае, што паказнік вырасце на 10 % у параўнанні з мінулай пяцігодкай.
Натуральна, што мы не маглі абысціся без выключэнняў. Паколькі рост ВУП за апошняе пяцігоддзе знаходзіцца каля 0, то з яго складана вывесці індэкс. У некаторых пытаннях мы пыталіся пра сцэнары развіцця без прывязкі да лічбаў (напрыклад, ці адбудзецца палітычная рэформа), таму там таксама не ўказваецца індэкс. Нарэшце ў двух паказніках мы не выстаўлялі нават якасную ацэнку (развіццё, стагнацыя ці пагаршэнне) – у пытанні пра прыярытэты знешняй палітыкі і долю выдаткаў на ахову здароўя. Гэта не значыць, што ў нас няма свайго меркавання, але першае пытанне вельмі палітызаванае, а наш Індэкс павінен служыць беларусам усіх палітычных поглядаў, а ў выпадку выдаткаў на ахову здароўя складана сказаць, якая іх доля ў бюджэце з’яўляецца пажаданай.
Звярніце ўвагу, што ў большасці выпадкаў мы ставілі пытанне не пра тое, што будзе праз пяць гадоў, але пра сярэдні паказнік цягам наступных пяці гадоў. Гэта звязана з тым, што, напрыклад, не мае асаблівага значэння, які будзе эканамічны рост у 2023 годзе, а якімі тэмпамі ён будзе расці да 2023 года.
Калі колькасныя паказнікі паходзяць з экспертнага апытання, то інтэрпрэтацыі (развіццё, стагнацыя ці пагаршэнне) – на сумленні аўтараў індэкса (Рыгор Астапеня і Андрэй Казакевіч).